१८ चैत, सप्तरी– टिपरको ठक्करबाट सप्तरीमा बोलेरो चालकको मृत्यु भएको छ । सप्तरीको खडक नगरपालिका ५ रंजितपुर सडकखण्डमा टिपरले ठक्कर दिँदा बोदेबर्साइन नगरपालिका ५ का बोलेरो चालक २६ वर्षीय शिवराज यादवको मृत्यु भएको जिल्ला प्रहरी कार्यालय सप्तरीले जनाएको छ ।पूर्व पश्चिम राजमार्गअन्तर्गत पूर्वतर्फ आउँदै गरेको विद्युत् कार्यालय बोदेबर्साइन सप्तरीको प्रदेश २–०१–००१ च ०३३४ नम्बरको बोलेरोलाई बिहीवार साँझ पछाडिबाट ना ७ ख २६५८ नम्बरको टिपरले ठक्कर दिँदा यादवको मृत्यु भएको प्रहरीले जनाएको छ ।दुर्घटनामा परेर गम्भीर घाइते भएका उनलाई उपचारको लागि अस्पतालमा ल्याउने क्रममा बाटोमै मृत्यु भएको थियो । सोही दुर्घटनामा परेर घाइते भएका अन्य ५ जनाको विभिन्न अस्पतालमा उपचार भइरहेको छ ।
दुर्घटना पश्चात् टिपरसहित चालकलाई नियन्त्रणमा लिई घटनाबारे अनुसन्धान भइरहेको प्रहरीले जनाएको छ ।
